03.03-31 – அடியும் முடியும் - (பொது)

03.03 – அடியும் முடியும் - (பொது)



2009-01-01 - 2009-07-02
அடியும் முடியும்
--------------------------------------
(108 குறள்வெண்பாக்கள்)
31) பழம்
------------
பழம்பொரு ளாய்ப்புதுமை ஆனமுக் கண்ணன்
கழல்கற் பகத்தின் பழம்.

பழம் - 1) பழைய; 2) கனி;

பழம்பொருள் ஆய்ப் புதுமை ஆன முக்கண்ணன் - மிகத் தொன்மையானவன்; என்றும் புதியவன்;

கழல் கற்பகத்தின் பழம் - அப்பெருமான் திருவடி கற்பகக்கனியை ஒக்கும்;

32) பிடி
------------
பிடிநடையாள் ஓர்கூ றுடைய பெருமான்
அடியிணையை நன்கு பிடி.

பிடி- பெண்யானை;

பிடிநடையாள் ஓர் கூறு உடைய பெருமான் - பெண் யானையைப் போன்ற நடையை உடைய உமாதேவியை ஒரு பங்காக உடைய சிவபெருமான்;

பிடித்தல் - பற்றிக்கொள்ளுதல்;

33) படி
-----------
படியீவான் பால்மதியன் பஞ்சக்கா லத்தில்
அடியார் மகிழும் படி.

படி- 1) தினசரிச்செலவுக்காகக் கொடுக்கும் பொருள்; 2) விதம்;

படி ஈந்த வரலாறு - 1) அப்பருக்கும், சம்பந்தருக்கும் திருவீழிமிழலையில் படிக்காசு அருளியது; 2) புகழ்த்துணை நாயனாருக்குப் படிக்காசு அருளியது;

34) அடை
--------------
அடைதோசை இட்டலிக் காகவே வாழா
திடைமருதன் தாளை அடை.

அடை - 1) சிற்றுண்டி வகைகளில் ஒன்று; 2) அடைதல் - சேர்தல்;

இடைமருதன் - திருவிடைமருதூர்ச் சிவன்;

35) விடை
---------------
விடையேறும் ஈசனை வேண்டினால் ஈவான்
அடைந்தார்க்கு நல்ல விடை.

விடை - 1) இடபம் (எருது); 2) பதில் (உத்தரம்);

அடைந்தார்க்கு - ஈசனைச் சரணடைந்தவர்களுக்கு;

36) அசைத்தல்
---------------
அசைத்தான் அரவை; அரக்கன் தனைச்செற்
றிசைகேட்டான் சென்னி அசைத்து.

பதம் பிரித்து:

அசைத்தான் அரவை; அரக்கன் தனைச் செற்று

இசை கேட்டான், சென்னி அசைத்து.

அசைத்தல் - 1) கட்டுதல்; 2) ஆட்டுதல்;

செறுதல் - வருத்துதல்; வெல்லுதல்; அழித்தல்;

சென்னி - தலை;

அசைத்தான் அரவை; - பாம்பை அரையில் நாணாகக் கட்டிய பெருமான்;

அரக்கன் தனைச் செற்று இசை கேட்டான், சென்னி அசைத்து - இராவணனை நசுக்கிப், பின் அவன் பாடிய இசையைக் கேட்டு மகிழ்ந்தான்;

37) ஊர்
------------
ஊர்விடை யான்சுட்டான் ஓரம்பால் எவ்விடமும்
பேர்கின்ற மூவரின் ஊர்.

ஊர் விடையான் - ஊர்கின்ற விடையை உடையவன் - இடப வாகனன் - சிவன்;

பேர்தல் - செல்லுதல்;

ஊர் - புரம்;

38) உண்டு
---------------
உண்டுண் டுடல்வளர்க்க ஓடுநெஞ்சே; கார்சேரும்
கண்டனைச் சிந்தி;உய் வுண்டு.

பதம் பிரித்து:

உண்டு உண்டு உடல் வளர்க்க ஓடும் நெஞ்சே; கார் சேரும்

கண்டனைச் சிந்தி; உய்வு உண்டு.

உண்டு - 1) சாப்பிட்டு; 2) உள்ளது; கிடைக்கும்;

ஓடுநெஞ்சே - ஓடும் நெஞ்சமே;

கார் சேரும் கண்டன் - கருமை பொருந்திய மிடற்றை உடையவன் - நீலகண்டன்;

39) நீர்
-----------
நீர்பாயும் செஞ்சடை நின்மலனைப் போற்றிவினை
தீர்ந்துய் வடையலாம் நீர்.

பதம் பிரித்து:

நீர் பாயும் செஞ்சடை நின்மலனைப் போற்றி, வினை

தீர்ந்து, உய்வு அடையலாம் நீர்.

நீர் - 1) கங்கை; 2) நீங்கள்;

40) வாள்
-------------

வாளரவம் சூடி வருமண்ணல் நீறணியெண்

தோளன்கை யில்மழு வாள்.

பதம் பிரித்து:

வாள்-அரவம் சூடி வரும் அண்ணல், நீறு அணி எண்

தோளன் கையில் மழு-வாள்.

வாள் - 1) ஒளி; கொடுமை; 2) வாள் என்ற ஆயுதம்;

தோள் - புஜம்;

அன்போடு,

வி. சுப்பிரமணியன்