04.74 – திருந்துதேவன்குடி - ("கற்கடேஸ்வரர் கோயில்")

04.74 – திருந்துதேவன்குடி - ("கற்கடேஸ்வரர் கோயில்")

2014-08-19

திருந்துதேவன்குடி (இக்காலத்தில் "கற்கடேஸ்வரர் கோயில்" - "திருவிசநல்லூர்" அருகுள்ளது)

----------------------

(கலிவிருத்தம் - 'மா மா மா மாங்கனி' என்ற வாய்பாடு)

இவ்வமைப்பில் தேவாரத்தில் பாடல் உள்ளதா என்று அறியேன்)

1)
புவனம் படைத்த புராணன் பொருவெள்விடை

இவரும் இறைவன் ஏழை இடமுள்ளவன்

சிவனல் வயல்சூழ் திருந்து தேவன்குடி

நவனை நண்ண நாளும் நலமாகுமே.

புவனம் படைத்த புராணன் - உலகங்களைப் படைத்த பழையவன்;

பொரு வெள் விடை இவரும் இறைவன் - போர் செய்யும் வெள்ளை இடபத்தை வாகனமாக உடையவன்; (இவர்தல் - ஏறிச் செலுத்துதல்);

ஏழை இடம் உள்ளவன் - உமையை இடப்பக்கம் உடையவன்;

சிவனல் வயல்சூழ் - சிவன், நல் வயல் சூழ்;

நவன் - புதியவன்; (சுந்தரர் தேவாரம் - 7.72.2 - "புரமவை எரிதர வளைந்தவில் லினனவன்" - 'வில்லினன் நவன் ' எனப் பிரிக்க, - திரிபுரங்கள் எரியுமாறு வளைந்த வில்லை உடையவனும், புதியவனும்....);

நண்ணுதல் - அடைதல்;

2)

கொன்றை கோங்கம் குரவம் குளிர்கூவிளம்

துன்று சடையன் தூயன் சுடுநீற்றினன்

தென்றல் உலவும் திருந்து தேவன்குடி

நின்ற வன்பேர் நினைய வினைநீங்குமே.

கொன்றை, கோங்கம், குரவம் - மலர்களின் பெயர்கள்;

கூவிளம் - வில்வம்; (சம்பந்தர் தேவாரம் - 2.6.1 - ""கோடல்கோங் கங்குளிர் கூவிள மாலை .... சூடு மொருவனார்);

துன்றுதல் - நெருங்கியிருத்தல்;

நின்றவன் - அகலாமல் நிலைத்து உறைபவன்;

3)

சாந்த நீற்றன் தலைவன் தடவெற்புறை

ஏந்தல் இமையோர் ஏத்தும் எருதேறிறை

சேந்தன் தாதை திருந்து தேவன்குடி

வேந்தன் பாதம் தொழுவார் வினைவீடுமே.

சாந்த நீற்றன் - திருநீற்றையே சந்தனமாகப் பூசியவன்; (சாந்தம் - சந்தனம்);

தட வெற்பு உறை ஏந்தல் - பெரிய கயிலைமலையில் உறையும் தலைவன்; (ஏந்தல் - பெருமையிற் சிறந்தோன்);

இமையோர் ஏத்தும் எருது ஏறு இறிறை - தேவர்கள் வழிபடும் இடபவாகனன்;

சேந்தன் தாதை - முருகனுக்குத் தந்தை;

வினை வீடுமே - வினை நீங்கும்;

4)

விழுந்த மதியை வேணி மிசைவைத்தவன்

விழுங்கு வேலை விடத்தை மிடறிட்டவன்

செழுந்தண் வயல்சூழ் திருந்து தேவன்குடிக்

கொழுந்தைக் குறுகி னார்க்குக் குறையில்லையே.

விழுந்த மதியை - விழுந்து வணங்கிய சந்திரனை;

வேணி மிசை வைத்தவன் - சடையின்மேல் அணிந்தவன்;

விழுங்கு வேலை விடத்தை மிடறி இட்டவன் - உண்ட கடல் நஞ்சைக் கண்டத்தில் வைத்தவன்; (வேலை - கடல்); (மிடறு - கண்டம்);

மிடறு இட்டவன் - கண்டத்தில் வைத்தவன்;

செழும் தண் வயல் சூழ் திருந்து தேவன்குடிக் கொழுந்தை - செழுமையான குளிர்ந்த வயல்கள் சூழ்ந்த திருந்துதேவன்குடியில் உறைகின்ற தலைவனை; (கொழுந்து - தலையாயவன்);

குறுகினார்க்குக் குறை இல்லையே. - அடைந்தவர்களது குறைகள் தீரும்; (குறுகுதல் - அணுகுதல்; அடைதல்);

(சுந்தரர் தேவாரம் - 7.26.8 - "நீறார் மேனியனே நிம லாநினை யன்றிமற்றுக்

கூறேன் நாவதனாற் கொழுந் தேயென் குணக்கடலே...." - கொழுந்து, உச்சிக்கண் நிற்பதாகலின், உயர்ந்த பொருளைக், 'கொழுந்து' என உவமம் பற்றிக் கூறல் வழக்கு.);

5)

வரையின் மகளை வாமம் மகிழுஞ்சிவன்

புரையில் புகழான் மதியைப் புனைவேணியில்

திரையன் வயல்சூழ் திருந்து தேவன்குடி

அரையன் அடியை அடைய அறுமேதமே.

வரையின் மகளை வாமம் மகிழும் சிவன் - மலைமகளைத் தன் இடப்பக்கம் பாகமாக விரும்பும் சிவன்; (சுந்தரர் தேவாரம் - 7.73.1 - "கரையுங் கடலும் ... உருத்திர லோகன் வரையின் மடமகள் கேள்வன் ...");

புரை இல் புகழான் - ஒப்பற்ற புகழை உடையன் / குற்றமற்ற புகழை உடையவன்; (புரை - ஒப்பு; குற்றம்);

மதியைப் புனை வேணியில் திரையன் - சந்திரனை அணிந்த சடையில் கங்கையை உடையவன்; (வேணி - சடை); (திரை - நதி);

அரையன் - அரசன்;

அறும் ஏதம் - பாவம், துன்பம் எல்லாம் நீங்கும்; (ஏதம் - குற்றம், கேடு, துன்பம்);

6)

பூவிட் டடியைப் போற்றிப் புகழ்வானவர்

ஆவி காத்தின் னமுதம் அருள்செய்தவன்

தேவி பங்கன் திருந்து தேவன்குடிக்

கோவின் நாமம் கூறக் குறைவில்லையே.

பூ இட்டு அடியைப் போற்றிப் புகழ் வானவர் ஆவி காத்து இன் அமுதம் அருள்செய்தவன் - மலர் தூவித் திருவடியை வழிபட்ட தேவர்களது உயிரைக் காத்தி இனிய அமுதை அருளியவன்;

தேவி பங்கன் - உமைபங்கன்;

திருந்து தேவன்குடிக் கோவின் நாமம் கூறக் குறைவு இல்லையே - திருந்து தேவன்குடியில் உறையும் அரசனது திருநாமத்தைக் கூறினால் குறை தீரும்; (கோ - அரசன்);

7)

அட்ட மூர்த்தி அரையில் அரவொன்றினைக்

கட்டும் அழகன் கண்டம் கறையாகிய

சிட்டன் வயல்சூழ் திருந்து தேவன்குடி

நட்டன் நாமம் கூற நலிவில்லையே.

அட்டமூர்த்தி - ஐம்பூதங்கள் சூரியன் சந்திரன், ஆன்மா என்ற எட்டுப்பொருள்களைத் தன் வடிவமாக உடையவன்;

அரவு ஒன்றினைக் கட்டும் அழகன் - அரையில் ஒரு பாம்பை அரைநாணாகக் கட்டியவன்;

சிட்டன் - சிஷ்டன் - சிஷ்டாசாரமுடையவன் - உயர்ந்தவன்; (शिष्टः 1 An eminent or distinguished person. -2 A wise man.)

நட்டன் - கூத்தன்;

8)

உன்னி டாமல் ஓடி மலைபேர்த்தவன்

சென்னி பத்தும் சிதைத்த சிவனெம்மிறை

செந்நெல் வயல்சூழ் திருந்து தேவன்குடி

மன்னன் பாதம் வாழ்த்த வருமின்பமே.

உன்னிடாமல் ஓடி மலை பேர்த்தவன் சென்னி பத்தும் சிதைத்த சிவன் - சற்றும் எண்ணாமல் ஓடிப்போய்க் கயிலைமலையைப் பெயர்த்த இராவணந்து பத்துத்தலைகளையும் நசுக்கி அழித்த சிவன்; (உன்னுதல் - எண்ணுதல்); (சிதைத்தல் - அழித்தல்; குலைத்தல்);

எம் இறை - எம் கடவுள்;

செந்நெல் வயல் சூழ் திருந்து தேவன்குடி மன்னன் - சிறந்த நெல் வயல் சூழ்ந்த திருந்து தேவன்குடியில் உறைகின்ற அரசன்; (செந்நெல் - செஞ்சாலிநெல் - A kind of superior paddy of yellowish hue);

பாதம் வாழ்த்த வரும் இன்பமே - அப்பெருமானது திருவடியை வாழ்த்தினால் இன்பம் வந்தடையும்;

9)

செய்ய மலர்மேல் திகழ்வான் திகிரிப்படைக்

கையன் இவர்கள் காணாக் கனலானவன்

செய்ய ணிந்த திருந்து தேவன்குடி

ஐயன் அடியை அடைவார்க் கழகாகுமே.

செய்ய மலர்மேல் திகழ்வான் - சிவந்த தாமரைமலர்மேல் இருக்கும் பிரமன்;

திகிரிப்படைக் கையன் - சக்கராயுதத்தை ஏந்திய திருமால்;

இவர்கள் காணாக் கனல் ஆனவன் - இவ்விருவரால் அடிமுடியைக் காண இயலாத சோதி; (சம்பந்தர் தேவாரம் - 1.80.9 - "கோணா கணையானுங் குளிர்தா மரையானுங் காணார் கழலேத்தக் கனலா யோங்கினான்")

செய் அணிந்த திருந்து தேவன்குடி ஐயன் - வயல்கள் சூழ்ந்த திருந்து தேவன்குடியில் உறைகின்ற தலைவன் ; (செய் - வயல்);

அடியை அடைவார்க்கு அழகு ஆகுமே - அப்பெருமானது திருவடியைச் சரணடைந்தவர்களுக்கு சுகம் உண்டாகும்; (அழகு - சுகம்); (சம்பந்தர் தேவாரம் - 2.10.10 - "ஐயன் சேவடி யேத்தவல் லார்க்கழ காகுமே." - அழகு - பேரின்ப வாழ்வு);

10)

தூறே சொல்லும் துரிசர் சொலைநீங்குமின்

ஆறோ டரவம் முடிமேல் அணியும்பரன்

சேறார் வயல்சூழ் திருந்து தேவன்குடி

ஏறே றிறையை ஏத்த இடரில்லையே.

தூறே சொல்லும் துரிசர் சொலை நீங்குமின் - பழித்துப் பேசும் வஞ்சகர்களது வார்த்தையை நீங்குங்கள்; (தூறு - பழிச்சொல்); (துரிசர் - குற்றம் உடையவர்); (சொலை - சொல்லை; இடைக்குறை விகாரம்);

ஆறு ஓடு அரவம் முடிமேல் அணியும் பரன் - திருமுடிமேல் கங்கை, மண்டையோடு, பாம்பு இவற்றையெல்லாம் அனிந்த பரமன்;

சேறு ஆர் வயல் சூழ் திருந்துதேவன்குடி - சேறு மிக்க வயல் சூழ்ந்த திருந்துதேவன்குடியில் உறைகிண்ற;

ஏறு ஏறு இறையை ஏத்த இடர் இல்லையே - இடபவாகனனை வாழ்த்தினால் துன்பம் தீரும்;

11)

மாயான் பிறவான் அங்கம் மறையோதிய

வாயான் மணமார் வாளி மதனைச்சுடு

தீயான் வயல்சூழ் திருந்து தேவன்குடி

மேயான் நாமம் சொல்வார் வினைவீடுமே.

மாயான் பிறவான் - இறப்பும் பிறப்பும் இல்லாதவன்; (மாய்தல் - இறத்தல்);

அங்கம் மறை ஓதிய வாயான் - நால்வேதமும் ஆறங்கமும் ஓதியவன்; (அங்கம் - ஆறங்கம் / வேதாங்கம் - சிட்சை வியாகரணம் சந்தசு நிருத்தம் சோதிடம் கற்பம் என ஆறுவகைப்பட்ட வேதப்பொருளை உணர்தற்குரிய கருவி);

(சம்பந்தர் தேவாரம் - 2.12.8 - "தூயானைத் தூயவா யம்மறை யோதிய வாயானை ...");

மணம் ஆர் வாளி மதனைச் சுடு தீயான் - மணம் பொருந்திய அம்புகளை (மலர்க்கணைகளை) உடைய மன்மதனை எரித்த நெருப்பாக இருப்பவன்; (வாளி - அம்பு); (தீயான் - 'தீயை ஏந்தியவன்' என்றும் கொள்ளலாம்);

திருந்து தேவன்குடி மேயான் - திருந்து தேவன்குடியில் எழுந்தருளியிருப்பவன்;

நாமம் சொல்வார் வினை வீடுமே - அப்பெருமானது திருநாமத்தை சொல்பவர்களது வினை நீங்கும்;

அன்போடு,

வி. சுப்பிரமணியன்

பிற்குறிப்பு :

1) யாப்புக்குறிப்பு :

கலிவிருத்தம் - 'மா மா மா மாங்கனி' என்ற வாய்பாடு

இவ்வமைப்பில் தேவாரத்தில் பாடல் உள்ளதா என்று அறியேன்.

2) சம்பந்தர் தேவாரத்தில் சில பதிகங்களில் அடியீற்றுச்சீர் மாங்கனிச்சீராகக் கருதுமாறும் வரக்காணலாம். உதாரணம்: 2.118.1 -

பொடிகள்பூசிப் பலதொண்டர் கூடிப் புலர்காலையே

அடிகளாரத் தொழுதேத்த நின்ற அழகன்னிடம்

கொடிகளோங்கிக் குலவும் விழவார் திலதைப்பதி

வடிகொள்சோலைம் மலர்மணங் கமழும் மதிமுத்தமே.

சம்பந்தரின் இப்பதிகத்தை வேறுவிதமாகச் சீர்பிரித்து ஈற்றுச் சீரை விளச்சீராகவும் கருதலாம்.

3) திருந்துதேவன்குடி - கற்கடேஸ்வரர் கோயில் தகவல்கள் - தினமலர் தளத்தில்: http://temple.dinamalar.com/New.php?id=386

திருந்துதேவன்குடி தலக்குறிப்பு: http://www.tamilvu.org/slet/l4100/l4100pd2.jsp?bookid=72&pno=357

'திருமுறைத் தலங்கள்' என்ற நூலில் பு.மா.ஜெயசெந்தில்நாதன் எழுதியது:

திருந்துதேவன்குடி என்னும் பெயருடைய ஊர் தற்போது இல்லை. கோயில் மட்டுமே உள்ளது. கோயில் இருந்த இடம் நன்செய் நிலங்களாயின. ‘கோயிலைச் சுற்றி அகழியுள்ளது.’.

-------------- --------------