08.05.030 - வேளை - ஒருவேலை - மடக்கு

 08.05 – பலவகை

கந்த ஷஷ்டியை ஒட்டி

2007-11-17

08.05.030 - வேளை - ஒருவேலை - மடக்கு

-------------------------

வேளை எரிக்க விழித்தான் மகன்முருக

வேளை வணங்கிட வேண்டுமோ - வேளை

ஒருவேலை ஏந்தி வருவோன்தாள் போற்றும்

ஒருவேலை செய்வார்க்குண் டுய்வு.

சொற்பொருள்:

வேளை - 1. மன்மதனை; 2. முருகனை; 3. காலம்/சமயம்/பொழுது;

ஒரு - 1. ஒப்பற்ற; 2. ஒன்று

வேலை - 1. முருகன் கையில் உள்ள ஆயுதம் ஆன வேலை; 2. தொழில்/செயல்;

வேளை எரிக்க விழித்தான் மகன் - மன்மதனை நெற்றிக்கண்ணால் எரித்த சிவனாரின் மகன் ஆன;

முருகவேளை வணங்கிட வேண்டுமோ வேளை - முருகப் பெருமானைத் தொழுவதற்குத் தனியாக ஒரு நேரம் வேண்டுமோ?

ஒரு வேலை ஏந்தி, வருவோன் தாள் போற்றும் ஒரு வேலை செய்வார்க்கு உண்டு உய்வு - ஒப்பற்ற வேலாயுதத்தைக் கையில் தாங்கி வருகின்ற முருகனுடைய திருவடியைத் தொழுகின்ற அந்த ஒரு செயலைச் செய்பவர்களுக்கு நற்கதி உண்டு.

வி. சுப்பிரமணியன்

-------------------------------- -------------------------------