08.04.040 - கண்ணப்பர் - (செஸ்டீனா)

08.04.040 - கண்ணப்பர் - (செஸ்டீனா)

2005-02-20

8.4.40 - கண்ணப்பர் - (செஸ்டீனா)

-----------

முற்குறிப்பு : செஸ்டீனா (Sestina) என்பது (இத்தாலியன், ஆங்கிலம், முதலிய) சில மேனாட்டு மொழிகளில் காணப்பெறும் 7 பாடல்கள் அமைந்த ஒரு தொகுப்பின் அமைப்பு. முதற்பாடலின் ஈற்றில் வரும் சொற்கள் ஒரு குறிப்பிட்ட வரிசையில் மற்ற 6 பாடல்களிலும் வரவேண்டும்.

தமிழில்:

மேற்சொன்ன வரிசையில், ஆனால் அடியீற்றுச் சொற்களின் வரிசையாக அல்லாமல் அடிகளின் முதற்சொற்களின் வரிசையாக அமைந்து வருமாறு இயற்றப்பட்ட பாடல்கள்.

முதல் 6 பாடல்கள் ஆறடிப் பாடல்களாகவும், 7-ஆம் பாடல் மூவடிப் பாடலாகவும் அமையும்.

செஸ்டினா அமைப்பில் முதல் ஆறடிகளின் முதற்சீர்கள் (ஆங்கிலத்தில் ஈற்றுச்சீர்கள்) அடுத்துவரும் ஐந்து பகுதிகளிலும் ஒரு பின்னல் போல் அமைவதல் இதனை "ஆறடிப் பின்னல்" என்று சொல்லலாம்.

1) 123456

2) 615243

3) 364125

4) 532614

5) 451362

6) 246531

7) 14, 25, 36

இப்பாடலில்:

1 = விண்ணில், 2 = கண்ணில், 3 = திண்ணன்,

4 = அண்ணல், 5 = புண்ணில், 6 = எண்ணில்

1) -- 123456

விண்ணில் விளங்கும் வெண்மதி அணிந்தவன்

கண்ணில் குருதி கசிவதைக் கண்ட

திண்ணன் மிகவும் திகைத்துப் பின்னர்

அண்ணல் பிணியை அகற்றத் துணிந்தப்

புண்ணில் தன்கண் இடந்து பொருத்தி

எண்ணில் புகழை எய்தி இணைந்தார்.

(இடத்தல் - அகழ்தல்); ( இலக்கணக் குறிப்பு: திண்ணன் .. இணைந்தார் - 1. ஒருமைபன்மை மயக்கம் என்று கருதலாம். திண்ணன் கண்ணை அப்பிக் கண்ணப்பர் ஆகி ஈசனைச் சேர்ந்தார்);

2) -- 615243

எண்ணில் எழுத்தில் இசையில் மண்ணில்

விண்ணில் இருக்கும் இறைவன் கண்ணில்

புண்ணில் குருதி பொங்கத் தன்னிரு

கண்ணில் ஒன்றைக் களிப்புடன் நெம்பி

அண்ணல் கண்ணில் அப்பிய அன்றே

திண்ணன் கலந்தார் சிவனுடன் ஒன்றாய்.

3) -- 364125

திண்ணன் பிரிந்து திகைத்து நின்றான்;

எண்ணில் அதுவும் இறைவன் அருளே;

அண்ணல் ஆலயம் அங்கவன் கண்டான்;

விண்ணில் திரிபுரம் வெந்திடச் செய்தவன்

கண்ணில் உதிரம் கண்டுதன் கண்ணையப்

புண்ணில் அப்பிப் புனிதனைக் கண்டான்.

4) -- 532614

புண்ணில் குருதிப் புனலைக் கண்ட

திண்ணன் உடனே செருப்புக் காலையக்

கண்ணில் வைத்து மறுகண் இடந்தான்;

எண்ணில் அரிய இச்செயல் கண்ட

விண்ணில் உள்ளார் வியந்தார்; முக்கண்

அண்ணல் நில்லுகண் ணப்ப என்றார்.

5) -- 451362

அண்ணல் அருவன் ஆயினும் திருவுருப்

புண்ணில் உதிரம் பொங்கக் காட்டி

விண்ணில் ஓரிடம் வேட்டுவ பத்தனாம்

திண்ணன் பெற்றிடத் திருவருள் புரிந்தான்;

எண்ணில் மாதவம் இயற்றியும் இருடிகள்

கண்ணில் புலப்படாக் கழலிணை காட்டினான்.

(எண்ணில் - எண் இல் - அளவற்ற);

6) -- 246531

கண்ணில் ஒன்றைக் கடிமலர் என்றே

அண்ணல் அடிகளில் அரியும் இட்டான்;

எண்ணில் அதுவும் ஆழியை அடையவே;

புண்ணில் மருந்தெனப் போடத் துணிந்து

திண்ணன் தன்கண் இடந்த திறத்தால்

விண்ணில் நிலைத்தான் கண்ணப்பன் என்று.

(எண்ணில் - எண்ணினால்; சிந்தித்தால்); (ஆழி - சக்கராயுதம்)

7) -- 14, 25, 36

விண்ணில் புரமெரித்த அண்ணல் தம்முடைய

கண்ணில் காட்டியஅப் புண்ணில் கண்ணப்பித்

திண்ணன் உய்ந்ததைநாம் எண்ணில் வினைகெடுமே.

வி. சுப்பிரமணியன்

பிற்குறிப்பு - *** பெரிய புராணம் - கண்ணப்ப நாயனார் புராணம் - சில பாடல்கள் ***

173

இதற்கினி என்கண் அம்பால் இடந்து அப்பின் எந்தையார் கண்

அதற்கிது மருந்தாய்ப் புண்ணீர் நிற்கவும் அடுக்கும் என்று

மதர்த்து எழும் உள்ளத்தோடு மகிழ்ந்து முன் இருந்து தங்கண்

முதற்சரம் அடுத்து வாங்கி முதல்வர் தம் கண்ணில் அப்ப

174

நின்ற செங்குருதி கண்டார் நிலத்தின் நின்றேப் பாய்ந்தார்

குன்றென வளர்ந்த தோள்கள் கொட்டினார் கூத்தும் ஆடி

நன்று நான் செய்த இந்த மதி என நகையும் தோன்ற

ஒன்றிய களிப்பினாலே உன்மத்தர் போல மிக்கார்

178

செங்கண் வெள்விடையின் பாகர் திண்ணனார் தம்மை ஆண்ட

அங்கணர் திருக்-காளத்தி அற்புதர் திருக்-கை அன்பர்

தங்கண் முன் இடக்குங் கையைத் தடுக்க மூன்று அடுக்கு நாக

கங்கணர் அமுதவாக்குக் கண்ணப்ப நிற்க என்ற

181

பேறினி இதன்மேல் உண்டோ? பிரான் திருக்-கண்ணில் வந்த

ஊறு கண்டு அஞ்சித் தம் கண் இடந்தப்ப உதவும் கையை

ஏறுயர்த்தவர் தம் கையால் பிடித்துக் கொண்டு என் வலத்தில்

மாறிலாய் நிற்க என்று மன்னு பேர்-அருள் புரிந்தார்

--------- ---------