6.3.45 - இழுக்குமொழி - நஞ்சுகந்தான் - மடக்கு

06.03 – மடக்கு

2009-12-30

6.3.45) இழுக்குமொழி - நஞ்சுகந்தான் - மடக்கு

--------------

இழுக்குமொழி பேசுவிழிப் பெண்களையும், என்றும்
இழுக்குமொழி சொல்வோர்கூட் டென்னும் - இழுக்குமொழி
நஞ்சுகந்தான் தாளிணையை நாளும் தொழுநிலைக்கும்
நஞ்சுகந்தான் தீரும் நலிவு.

பதம் பிரித்து:
இழுக்கும் மொழி பேசு விழிப் பெண்களையும், என்றும்
இழுக்கு-மொழி சொல்வோர் கூட்டு என்னும் - இழுக்கும் ஒழி;
நஞ்சு உகந்தான் தாளிணையை நாளும் தொழு; நிலைக்கும்
நம் சுகம் தான்; தீரும் நலிவு.

இழுக்குமொழி - 1. இழுக்கும் மொழி (ஈர்க்கின்ற மொழி); 2. இழுக்கு மொழி (வழு/குற்றம் உடைய சொற்கள்); 3. இழுக்கும் ஒழி (குற்றத்தையும் நீங்கு);
கூட்டு - உறவு; சினேகம்;
நஞ்சுகந்தான் - 1. நஞ்சு உகந்தான் (ஆலகால விஷத்தை விரும்பிய சிவபெருமான்); 2. நம் சுகம் தான்;
நலிவு - துன்பம்;

வி. சுப்பிரமணியன்

-------------------------------- -------------------------------