P.251 - கொடிமாடச் செங்குன்றூர் (திருச்செங்கோடு) - வெளியபொடி திகழ்கின்ற

2014-10-30

P.251 - கொடிமாடச் செங்குன்றூர் (திருச்செங்கோடு)

----------------------------------

(நாலடித் தரவு கொச்சகக் கலிப்பா)

(சம்பந்தர் தேவாரம் - 2.48.1 - "கண்காட்டு நுதலானும்")

1)
வெளியபொடி திகழ்கின்ற மேனியனை வேதியனைத்

தளிர்மதியும் திரைபுனலும் சடைமீது தரித்தவனைக்

குளிர்மதியம் அணவுகின்ற கொடிமாடச் செங்குன்றூர்

எளியவனை இருபோதும் எண்ணிலிரு வினைவீடே.

வெளிய பொடி திகழ்கின்ற மேனியனை - வெண்திருநீறு திகழும் திருமேனியனை; (வெளிய - வெள்ளிய - வெண்மையான); (சம்பந்தர் தேவாரம் - 1.2.5 - "செய்யமேனி வெளியபொடிப் பூசுவர்");

வேதியனைத் - வேதப்பொருளை; வேதம் ஒதுபவனை;

தளிர்மதியும் திரைபுனலும் சடைமீது தரித்தவனைக் - இளந்திங்களையும் அலைக்கின்ற கங்கையையும் சடைமேல் சூடியவனை; (திரைதல் / திரைத்தல் - அலையெழுதல்);

குளிர்மதியம் அணவுகின்ற கொடிமாடச் செங்குன்றூர் - குளிர்ந்த திங்கள் அணுகும் (= உயரம் மிக்க) திருச்செங்கோட்டில் உறைகின்ற; (அணவுதல் - அணுகுதல்; தழுவுதல்); (கொடிமாடச் செங்குன்றூர் - திருச்செங்கோடு);

எளியவனை இருபோதும் எண்ணில் இருவினை வீடே - (அன்பர்க்கு) எளியவனை இருவேளையும் எண்ணினால் இருவினைகள் அழியும்; (வீடு - நீக்கம்; முடிவு);

2)

ஏலமலர்க் குழலாளை இடப்பக்கம் உடையானை

ஆலமர நீழலில்நல் லறஞ்சொன்ன ஆரியனைக்

கோலமதி தடவுகின்ற கொடிமாடச் செங்குன்றூர்

நீலமணி மிடற்றானை நினையவிரு வினைவீடே.

ஏலமலர்க் குழலாளை இடப்பக்கம் உடையானை - வாசமலர்க்கூந்தலை உடைய உமாதேவியை இடப்பாகமாக உடையவனை;

ஆலமரநீழலில் நல்லறம் சொன்ன ஆரியனைக் - கல்லாலின்கீழ் வேதப்பொருளை உபதேசித்த குருவை;

கோலமதி தடவுகின்ற கொடிமாடச் செங்குன்றூர் - அழகிய திங்கள் தொடும்படி உயர்ந்த திருச்செங்கோட்டில் உறைகின்ற; (கோலம் - அழகு);

நீலமணி மிடற்றானை நினையவிரு வினைவீடே - நீலமணிகண்டனை நினைந்தால் இருவினை நீங்கும்; (மிடறு - கண்டம்);

3)

இரக்கமுடைப் பெருமானை ஏந்திழையார் கடையிற்போய்

இரக்கவொரு சிரமேந்தும் எம்மானைச் செம்மானைக்

குரக்கினங்கள் குதிகொள்ளும் கொடிமாடச் செங்குன்றூர்

வரக்கரனை மறவாது வாழ்த்தவிரு வினைவீடே.

இரக்கமுடைப் பெருமானை - தயாபரனை;

ஏந்திழையார் கடையிற்போய் இரக்க ஒரு சிரம் ஏந்தும் எம்மானை - பெண்கள் வீட்டுவாயிலில் சென்று யாசிக்க ஒரு மண்டையோட்டை ஏந்தும் எம்பெருமானை; (ஏந்திழை - பெண்); (இரத்தல் - பிச்சையெடுத்தல்); (கடை - வீட்டுவாயில்);

செம்மானை - செம்மேனியனை; (சம்பந்தர் தேவாரம் - 1.87.10 - "செருமால் விடையூருஞ் செம்மான்");

குரக்கினங்கள் குதிகொள்ளும் கொடிமாடச் செங்குன்றூர் - குரங்குகள் குதித்து மகிழும் திருசெங்கோட்டில் உறைகின்ற; (குரக்கினங்கள் - குரங்குக் கூட்டங்கள்; செம்பு-செப்பு, இரும்பு-இருப்பு, என்பன போல், குரங்கு-குரக்கு என்று திரியும்);

வரக்-கரனை மறவாது வாழ்த்த இருவினை வீடே - வரதஹஸ்தனான சிவபெருமானை மறவாமல் என்றும் துதித்தால் இருவினை நீங்கும்; (வரக்கரன் - வரத்தை அருளும் கரத்தை உடையவன் - வரதஹஸ்தன்; வரம், கரம் என்ற சொற்களைத் தமிழ்ச்சொற்களாகக் கொண்டதால், புணர்ச்சியில் 'க்' மிக்கது. அன்றேல், "வரகரன்" - வரத்தைத் தருபவன் - என்ற வடசொல், எதுகைக்காக 'க்' மிக்கு வந்தது என்றும் கொள்ளல் ஆம்); (வரக்கரன் - இரண்டாம்வேற்றுமை உருபும் பயனும் உடன்தொக்க தொகையில் வலிமிகும்); (சம்பந்தர் தேவாரம் - 1.20.4 - "நலம் மலிதரு கரன் - நன்மை மிகுந்த திருக்கரங்களை உடையவன்); (ஆதிசங்கரர் அருளிய அன்னபூர்ணாஷ்டகம் - "நித்யானந்தகரீ வராபயகரீ"; வராபயகரீ = வரகரீ, அபயகரீ = Salutations to Mother Annapoorna, who always give joy to Her devotees, along with boons and assurance of fearlessness ); (करः 1 A hand; .....-9 A doer. )

4)

மட்டவிழும் மலர்க்குழலி மலைமகளோர் பங்குடையான்

இட்டமொடு நஞ்சுண்ட இருள்கண்டன் இமையவர்கோன்

குட்டியொடு மந்திதிரி கொடிமாடச் செங்குன்றூர்ச்

சிட்டனவன் திருநாமம் செப்பவிரு வினைவீடே

மட்டு அவிழும் மலர்க்குழலி மலைமகள் ஓர் பங்கு உடையான் - மணம் விரியும் மலர்களைச் சூடிய கூந்தலை உடைய உமாதேவியை ஒரு பங்கில் உடையவன்; (மட்டு - தேன்);

இட்டமொடு நஞ்சு உண்ட இருள்கண்டன் - விரும்பி ஆலகாலத்தை உண்டருளிய நீலகண்டன்; (இட்டம் - இஷ்டம் - விருப்பம்); (இருள்தல் - கறுத்தல்);

இமையவர்கோன் - வானோர் தலைவன்;

குட்டியொடு மந்தி திரி- கொடிமாடச் செங்குன்றூர்ச் - மந்திகள் குட்டிகளோடு திரிகின்ற திருச்செங்கோட்டில் உறைகின்ற;

சிட்டனவன் திருநாமம் செப்ப இருவினை வீடே - சிஷ்டனான சிவபெருமான் திருநாமத்தைச் சொன்னால் இருவினை நீங்கும்; (சிட்டன் - சிஷ்டாசாரம் உடையவன்; மேலானவன்);

5)

வண்டமரும் மலர்க்குழலி மருவுமிடப் பாகத்தன்

வெண்டிரையார் வேலைதனில் விளைநஞ்சை அமுதுண்ட

கொண்டலன கண்டத்தன் கொடிமாடச் செங்குன்றூர்

அண்டனடி தொழுவாரை அருவினைநோய் அடையாவே.

வண்டு அமரும் மலர்க்குழலி மருவும் இடப் பாகத்தன் - வண்டுகள் விரும்பும் மலர்க்கூந்தலையுடைய உமையை இடப்பாகமாக உடையவன்; (மருவுதல் - தழுவுதல்);

வெண்-திரை ஆர் வேலைதனில் விளை நஞ்சை அமுதுண்ட கொண்டல் அன கண்டத்தன் - வெள்ளிய அலைகள் இருக்கும் பாற்கடலில் தோன்றிய ஆலகாலத்தை அமுதுபோல் உண்ட, மேகம் போன்ற கரிய நிறமுடைய கண்டத்தை உடையவன்; (திரை - அலை); (வேலை - கடல்); (கொண்டல் - மேகம்) (அன - அன்ன - இடைக்குறை);

கொடிமாடச் செங்குன்றூர் அண்டன் அடி தொழுவாரை அருவினைநோய் அடையாவே - திருச்செங்கோட்டில் உறைகின்ற கடவுளின் திருவடியை வழிபடுபவர்களை வினைகள் அடையமாட்டா; (அண்டன் - அண்டங்களுக்கெல்லாம் தலைவன்);

6)

வாளனகண் மங்கைபங்கன் மலர்க்கணைகள் ஐந்துடைய

வேளையெரி கண்ணுதலான் விரிசடைமேல் வெண்மதியன்

கோளரவக் கச்சுடையான் கொடிமாடச் செங்குன்றூர்க்

காளகண்டன் கழலிணையைக் கைதொழுவார் கவலாரே.

வாள் அன கண் மங்கைபங்கன் - வாள் போன்ற கண்ணையுடைய உமையை ஒரு பங்கில் உடையவன்; (அன - அன்ன); (சுந்தரர் தேவாரம் - 7.20.1 - "வாளன கண்மடவாளவள்");

மலர்க்கணைகள் ஐந்து உடைய வேளை எரி கண்ணுதலான் - ஐந்து மலரம்புகளை உடைய மன்மதனை எரித்த நெற்றிக்கண்ணன்; (வேள் - மன்மதன்);

விரிசடைமேல் வெண்மதியன் - விரித்த சடைமேல் பிறையைச் சூடியவன்;

கோள்-அரவக் கச்சு உடையான் - கொடிய பாம்பை அரைக்கச்சாகக் கட்டியவன்; (கோள் - கொடிய)

கொடிமாடச் செங்குன்றூர்க் காளகண்டன் கழலிணையைக் கைதொழுவார் கவலாரே - திருச்செங்கோட்டில் உறைகின்ற நீலகண்டனது இரு-திருவடிகளை வழிபடும் அன்பர்களுக்குக் கவலை இல்லை; (காளகண்டன் - நீலகண்டன்);

7)

செம்பொன்னார் சடையுடையான் சிலையாக மலையேந்தி

அம்பொன்றால் அரண்மூன்றை ஆரழல்வாய்ப் படவைத்தான்

கொம்பன்னாள் ஒருகூறன் கொடிமாடச் செங்குன்றூர்

நம்பன்தாள் தொழுதேத்த நசியும்வல் வினைக்கட்டே.

செம்பொன் ஆர் சடை உடையான் - செம்பொன் போன்ற சடையை உடையவன்;

சிலையாக மலை ஏந்தி அம்பு ஒன்றால் அரண் மூன்றை ஆரழல்வாய்ப் படவைத்தான் - வில்லாக மேருமலையைக் கையில் ஏந்தி ஒரு கணையால் முப்புரங்களைத் தீப்புகச்செய்தவன்; (சிலை - வில்);

கொம்பு அன்னாள் ஒரு கூறன் - பூங்கொம்பு போன்ற உமையை ஒரு கூறாக உடையவன்;

கொடிமாடச் செங்குன்றூர் நம்பன் தாள் தொழுதேத்த நசியும் வல்வினைக்கட்டே - திருச்செங்கோட்டில் உறைகின்ற சிவபெருமானது திருவடியை வழிபட்டால் வலிய வினைக்கட்டு அழியும்; (நம்பன் - சிவன் திருநாமம் - விரும்பத்தக்கவன்); (நசிதல் - அழிதல்);

8)

வாராரும் முலைமங்கை ஒருபங்கன் மாமலையை

ஓராமல் இடந்தவனை ஒருவிரலால் அடர்த்தபரன்

கூராரும் சூலத்தன் கொடிமாடச் செங்குன்றூர்ப்

பேராமல் உறைவான்சீர் பேசவரும் பெரும்புகழே.

வார் ஆரும் முலை மங்கை ஒரு பங்கன் மாமலையை - கச்சு அணிந்த முலையை உடைய உமையை ஒரு பங்கில் உடையவனது கயிலைமலையை;

ஓராமல் இடந்தவனை ஒருவிரலால் அடர்த்தபரன் - சற்றும் எண்ணாமல் பெயர்த்து எறிய முயன்ற இராவணனை ஒரு திருப்பாதவிரலை ஊன்றி நசுக்கிய பரமன்; (ஓர்தல் - எண்ணுதல்); (இடத்தல் - தோண்டுதல்; பெயர்த்தல்); (அடர்த்தல் - நசுக்குதல்);

கூர் ஆரும் சூலத்தன் - கூர்மை மிக்க திரிசூலத்தை உடையவன்;

கொடிமாடச் செங்குன்றூர்ப் பேராமல் உறைவான் - திருச்செங்கோட்டில் நீங்காமல் உறைகின்ற பெருமானது; (இலக்கணக் குறிப்பு: ஏழாம்வேற்றுமைத்தொகையில் வரும் வலி மிகும்);

சீர் பேசவரும் பெரும்புகழே. - 1. சீர் பேச, வரும் பெரும்புகழே = சீரைப் பேசும் பக்தர்களுக்குப் பெரும்புகழ் வரும்; 2. சீர், பேச அரும்-பெரும்-புகழே = சீர் பேசுவதற்கு அரிய பெரிய புகழே = எல்லையற்ற புகழை உடையவன்;

9)

வெல்பவரார் என்றிருவர் மிகநேடித் தொழுசோதி

சில்பலிக்கென் றுழல்பெருமான் சேயிழையோர் பங்குடையான்

கொல்புலித்தோல் அரைக்கசைத்தான் கொடிமாடச் செங்குன்றூர்ப்

பல்புகழான் பாதமலர் பணிவார்தம் வினைவீடே.

வெல்பவர் ஆர் என்று இருவர் மிக நேடித் தொழு-சோதி - தம்மில் யார் பெரியவர் என்ற போட்டியில் பிரமனும் திருமாலும் அடிமுடியை மிகவும் தேடிக் காணாராய்த் தொழுத ஜோதி; (நேடுதல் - தேடுதல்);

சில்பலிக்கு என்று உழல் பெருமான் - பிச்சைக்காகத் திரியும் பெருமான்; (சில் - சில); (பலி - பிச்சை);

சேயிழை ஓர் பங்கு உடையான் - உமையை ஒரு பங்கில் உடையவன்;

கொல்புலித்தோல் அரைக்கு அசைத்தான் - கொல்லும் புலியின் தோலை அரையில் கட்டியவன்; (அசைத்தல் - கட்டுதல்);

கொடிமாடச் செங்குன்றூர்ப் பல்புகழான் - திருச்செங்கோட்டில் உறைகின்ற, பலவாகப் புகழ்ந்துரைக்கப்படுபவன்; (சம்பந்தர் தேவாரம் - 3.55.1 - "உரையார் பல்புகழாய்");

பாதமலர் பணிவார்தம் வினை வீடே - அப்பெருமானது திருவடித்தாமரையை வணங்கும் அன்பர்களது வினைகள் நீங்கும்;

10)

செவியிருந்தும் சிவன்சீரைக் கேளாத செவிடருரை

அவிநெறிகள் அடையேன்மின் ஆதியந்தம் இல்லாதான்

குவிமுலையாள் பிரியாதான் கொடிமாடச் செங்குன்றூர்

அவிர்சடையான் திருநாமம் அணிநாவர்க் கரணாமே.

செவி இருந்தும் சிவன்-சீரைக் கேளாத செவிடர் உரை அவிநெறிகள் அடையேன்மின் - காதுகள் இருந்தும் சிவன் திருப்புகழைக் கேளாத செவிடர்கள் சொல்கின்ற அழியும் மார்க்கங்களை நீங்கள் சென்றடையவேண்டா; (அவிதல் - அழிதல்; அவித்தல் - அழித்தல்; கெடுத்தல்) (அடையேன்மின் - நீங்கள் சேரவேண்டா);

ஆதி அந்தம் இல்லாதான் - முதலும் முடிவும் இல்லாதவன்;

குவிமுலையாள் பிரியாதான் - குவிந்த முலைகளையுடைய உமையை ஒரு கூறாக உடையவன்;

கொடிமாடச் செங்குன்றூர் அவிர்-சடையான் - திருச்செங்கோட்டில் உறைகின்ற, ஒளிவீசும் சடையை உடையவன்; (அவிர்தல் - பிரகாசித்தல்);

திருநாமம் அணி-நாவர்க்கு அரண் ஆம் - அப்பெருமானது திருநாமமான திருவைந்தெழுத்தை நாவில் அணிந்தவர்களுக்கு அது சிறந்த பாதுகாவல் ஆகும்; (அப்பர் தேவாரம்- 4.11.2 - "நாவினுக்கு அருங்கலம் நமச்சிவாயவே"); (அப்பர் தேவாரம்- 4.81.8 - "படைக்கலமாக உன் நாமத்து எழுத்தஞ்சு என் நாவிற்கொண்டேன்");

11)

பொடியணிந்த திருமார்பன் பூதகணம் புடைசூழ்ந்து

துடியொலிக்கச் சுடலைதனிற் சுழன்றாடும் திருப்பாதன்

கொடியிடையாள் கூறுடையான் கொடிமாடச் செங்குன்றூர்

அடிகளையே அடிபரவும் அடியார்தம் வினையறுமே.

பொடி அணிந்த திருமார்பன் - திருமார்பில் திருநீற்றைப் பூசியவன்;

பூதகணம் புடைசூழ்ந்து துடி ஒலிக்கச் சுடலைதனில் சுழன்று ஆடும் திருப்பாதன் - பூதகணங்கள் சூழ்ந்து உடுக்கைகளை ஒலிக்கச் சுடுகாட்டில் சுழன்று ஆடுகின்ற திருப்பாதத்தை உடையவன்; (துடி - உடுக்கை); (சுடலை - சுடுகாடு);

கொடியிடையாள் கூறு உடையான் - கொடி போன்ற இடையை உடைய உமையை ஒரு கூறாக உடையவன்; அர்த்தநாரீஸ்வரன்;

கொடிமாடச் செங்குன்றூர் அடிகளையே அடிபரவும் அடியார்தம் வினை அறுமே - திருச்செங்கோட்டில் உறையும் சுவாமியையே வணங்கும் அடியவர்களது வினைகள் அழியும்; (அடிகள் - கடவுள்); (அடிபரவுதல் - வணங்குதல்);

வி. சுப்பிரமணியன்

----------- --------------